Qazaqstannyń Bas múftıi Ramazan aıynyń qarsańynda elimizde jarııalanǵan tótenshe jaǵdaı talaptary eskerilip, qaýipsizdikti saqtaý úshin aýyzashar berýdiń ornyna oraza ustaǵan jandarǵa tamaq taratyp, áleýmettik jaǵdaıy tómen otbasylarǵa azyq-túlik úlestirýge, olarǵa qarjylaı qoldaý kórsetýge shaqyrǵan bolatyn.
Buǵan deıin birneshe ret qaıyrymdylyq sharalardy uıymdastyryp, ıgi isterdiń basy-qasynda júretin Baıken Áshirbaev tótenshe jaǵdaı kezinde az qamtylǵan januıalarǵa járdem berýdi jón sanaǵan.
Jomart júrekti azamat Shymkenttegi «Jylanbuzǵan», «Abdýl Abad», «Qyzyljar», «Týrdy abat», «Maıatas», «Toǵys», «Badam-1», «Badam-2», «Juldyz», «Jalyn», «Qaratóbe», «Qaınarbulaq» turǵyn alaptaryndaǵy az qamtylǵan otbasylarǵa «aýyzashar qorjynyn» úlestirdi. Ár otbasyǵa taratylǵan «aýyzashar qorjynynda» 1 qap un, 5 lıtr ósimdik maıy, 5 keli qant, 5 keli makaron, shaı syndy kúndelikti tutynatyn azyq-túlik túrleri bar. Sonymen qatar betperdeler de taratyldy.
Izgi shara «Jylanbuzǵan» turǵyn alabynyń turǵyndaryna azyq-túlikterdi taratýdan bastaldy. Qarapaıym halyqqa azyq-túlikterdi kásipkerdiń ózi men bokstan álem chempıony Qaırat Eralıev pen kıkbostan álem chempıony Núrken Tólegenovter úlestirdi.
Qasıetti aıda qaıyrym jasaýdy azamattyq mindeti sanap, 550 otbasynyń alǵysyn alǵan Baıken Áshirbaev jerlesterine járdem berýdi aldaǵy ýaqytta da jalǵastyratynyn málimdedi.
Shymkent
